За апошнія пяць гадоў колькасць беларусаў у Польшчы вырасла на 287 тысяч чалавек, прычым як мінімум 38 тысяч пасяліліся ў суседняй краіне за мінулы год. Так лічыць кракаўскі раённы дэпутат Міколай Касей на падставе даследавання, піша Polskie Radio.
Міколай Касей прааналізаваў электронны рэестр уліку насельніцтва Польшчы і выявіў, што ў 2024 годзе там з’явілася не менш за 38 тысяч беларускіх імёнаў. Галоўныя высновы яго даследавання наступныя:
- на пачатак 2025 года ў Польшчы было зарэгістравана больш за 348 тысяч чалавек з беларускімі імёнамі, як з польскім грамадзянствам, так і без;
- з 2024 года колькасць беларусаў у дзяржаўным рэестры імёнаў вырасла на 12%;
- за апошнія пяць гадоў, з 2020 года, колькасць беларускіх мігрантаў у Польшчы павялічылася на 280 тысяч чалавек.
Аўтар даследавання прааналізаваў звесткі пра колькасць беларусаў у Польшчы на аснове ананімных звестак з базы дадзеных PESEL — дзяржаўнага рэестра ўліку насельніцтва. Частку імёнаў можна адназначна ідэнтыфікаваць як беларускія — з мужчынскіх гэта, напрыклад, Aliaksandr, Siarhei, Dzmitry. Уладальнікі гэтых імёнаў адразу траплялі ў спіс беларусаў.
Такія імёны, як Ivan, Ruslan ці Andrei, маглі належаць не толькі беларусам, але і ўкраінцам, і расіянам. У гэтым выпадку выкарыстоўвалася прапарцыйная сістэма.
Агульная колькасць мужчын з беларускімі імёнамі ў Польшчы ацэньваецца ў 201 620 чалавек, жанчын — 147 026 чалавек. Такім чынам, агульную колькасць беларусаў і беларусак у Польшчы можна ацаніць у 348,5 тысячы чалавек.
На пачатак 2020 года колькасць беларусаў у Польшчы складала 61,7 тысячы. Самы вялікі рост быў адзначаны ў 2022 годзе, калі ў суседнюю краіну перасялілася больш за 103 тысячы беларусаў. За апошнія пяць гадоў колькасць беларусаў у Польшчы вырасла на 287 тысяч чалавек.
Нагадаем, паводле інфармацыі польскага Упраўлення па справах замежнікаў, у 2024 годзе беларусы сталі другой па колькасці групай замежнікаў, якія атрымалі міжнародную абарону ў Польшчы (2600 чалавек) і другой па атрыманні віду на жыхарства (42 тысячы).
Адзначым, лічбу ў 38 тысяч беларусаў, якія з’ехалі летась (як і 42 тысячы, што атрымалі ВНЖ), можна супаставіць з колькасцю буйнога беларускага райцэнтра: напрыклад, паводле звестак Белстата, на 1 студзеня 2024 года ў Ваўкавыску налічвалася 41 510 чалавек, у Калінкавічах — 36 941 чалавек.
Чытайце таксама
